९ फागुन,काठमाडौं - नेपाली कम्युनिष्ट पार्टीक संयोजक पुष्पकमल दाहाल प्रचण्डले पूर्वराजा ज्ञानेन्द्र शाहको हालैको अभिव्यक्तिप्रति तीव्र असन्तुष्टि जनाएका छन्। दोलखा–काठमाडौं सम्पर्क निर्वाचन परिचालन कमिटीले आयोजना गरेको चुनावी सभालाई सम्बोधन गर्दै उनले चुनावको औचित्यमाथि प्रश्न उठाउने प्रवृत्तिको आलोचना गरे।
सभामा बोल्दै उनले जनताबाट अस्वीकृत भइसकेका व्यक्तिहरूले निर्वाचनबारे भ्रम फैलाउने प्रयास गरेको आरोप लगाए। “चुनाव हुँदैन वा हुनुहुँदैन भन्ने हल्लाका पछि नलाग्नुस्,” उनले पार्टीका तर्फबाट आह्वान गर्दै भने, “दृढताका साथ चुनावी अभियानमा जुट्नुस्।”
पूर्वराजा शाहले देशका मूल समस्या समाधान नगरी गरिने चुनावबाट निकास सम्भव नहुने धारणा सार्वजनिक गरेका थिए। त्यसप्रति प्रतिक्रिया दिँदै दाहालले प्रतिक्रियावादी र प्रतिगामी शक्तिहरूको चलखेलको कुनै अर्थ नरहेको दाबी गरे। उनका अनुसार देशको वर्तमान जटिल परिस्थितिबाट बाहिर निस्कने एकमात्र लोकतान्त्रिक उपाय निर्वाचन नै हो।
उनले अहिलेको राजनीतिक वातावरण यथावत् रहेमा नेकपा पहिलो शक्ति बन्ने आधार तयार भइरहेको पनि जिकिर गरे। साथै, “नयाँ” नाममा अघि सारिएका विकल्पहरूको वास्तविकता जनताले बुझिसकेको दाबी गर्दै उनले मतदातालाई भ्रममा नपर्न आग्रह गरे।
