२१ चैत,काठमाडौं - पूर्वउपप्रधानमन्त्री तथा नेकपाका केन्द्रीय सदस्य वामदेव गौतमले नवनियुक्त प्रधानमन्त्री बालेन्द्र शाहलाई खुला पत्र लेख्दै एमाले अध्यक्ष केपी शर्मा ओलीलाई हिरासतमा राखिएको विषयप्रति गम्भीर असन्तुष्टि जनाएका छन्।
प्रधानमन्त्रीमा निर्वाचित भएकोमा बधाई दिँदै गौतमले ओलीमाथि गरिएको व्यवहार राजनीतिक र मानवीय दुवै दृष्टिले अनुचित रहेको बताएका छन्। उनले ७४ वर्षीय, स्वास्थ्य अवस्था कमजोर रहेको नेतामाथि गरिएको यस्तो व्यवहारले लोकतान्त्रिक मूल्य–मान्यतामाथि प्रश्न उठाएको उल्लेख गरेका छन्।
आफ्नो पत्रमा उनले भदौ २३ र २४ मा भएको ‘जेनजी आन्दोलन’ र त्यसपछि विकसित घटनाक्रमको स्मरण गर्दै त्यसबेला कांग्रेस–एमालेको संयुक्त सरकार रहेको र १९ जनाको ज्यान गएको दुःखद घटनापछि आफूले नै ओलीलाई राजीनामा दिन सुझाव दिएको बताएका छन्। उनले ओलीको राजीनामा, प्रतिनिधिसभा विघटनदेखि लिएर पछिल्ला राजनीतिक प्रक्रियासम्ममा ओलीको योगदान रहेको पनि उल्लेख गरेका छन्।
तर, अहिले कुनै ठोस प्रमाण वा न्यायिक परीक्षणबिना बिहानै घर घेरेर पक्राउ गर्नु कानुनी राज्यको मर्मविपरीत भएको गौतमको तर्क छ। उनले कानुन अनुसार कुनै पनि आरोप अदालतबाट प्रमाणित भएपछि मात्र कारबाही हुनुपर्ने जिकिर गरेका छन्।
२१ चैत,काठमाडौं - उनले पत्रमा लेखेका छन् कि मृत्युदण्ड दिने देशहरूमा समेत दोषीलाई अन्तिम इच्छा सोधिन्छ, तर यहाँ भने प्रारम्भिक परीक्षणबिना नै पक्राउ गर्ने अभ्यास देखिएको छ, जुन गलत भएको उनको भनाइ छ।
गौतमले सरकारलाई यस्तो कार्यशैली सच्याउन आग्रह गर्दै विशेषगरी वृद्ध र अस्वस्थ व्यक्तिमाथि मानवीय व्यवहार अपनाउनुपर्नेमा जोड दिएका छन्। साथै, प्रधानमन्त्री शाहलाई सफल कार्यकालको शुभकामना दिँदै उनले न्यायपूर्ण र विधिसम्मत ढङ्गले शासन सञ्चालन गर्न सुझाव दिएका छन्।
उनले लेखेका छन्,
सम्मननीय प्रधानमन्त्रीका नाममा खुल्लापत्र
सम्माननीय प्रधानमन्त्री बालेन्द्र शाहज्यू !
प्रतिनिधिसभा सदस्य निर्वाचनमा निर्वाचित हुनुभएको र देशको कार्यकारी प्रमुखका रूपमा प्रधानमन्त्रीको जिम्मेवारी सम्हाल्नु भएकोमा तपाईंलाई धेरै धेरै बधाई तथा शुभकामना व्यक्त गर्दछु ।
यस सन्दर्भमा तपाईंलाई केही ध्यानाकर्षण तथा सुझाव दिने प्रयत्न गरेको छु ।
२०७९ सालमा सम्पन्न प्रतिनिधिसभा निर्वाचनमा कुनै पनि पार्टीले एकल बहुमत हासिल गर्न सकेनन् । बाध्यात्मक अवस्थामा मिलीजुली सरकार सञ्चालन गर्नुपर्ने अवस्था आयो ।
यस वर्षको भदौ २३ र २४ गते भएको जेनजी आन्दोलन र दमन तथा राष्ट्रिय विध्वंसको अवस्थामा नेपाली कांग्रेस र नेकपा (एमाले) को मिलीजुली सरकार थियो र प्रधानमन्त्री केपी शर्मा ओली हुनुहुन्थ्यो ।
भाद्र २३ को घटनामा त्यसै दिन १९ जना आन्दोलनकारीको मृत्यु भयो । त्यसपछि अरू धेरै व्यक्तिले घाइते अवस्थामा अस्पतालमै मृत्युवरण गरे । यो अत्यन्त दुखद र पीडादायी घटना बनिरहेको अवस्थामा प्रधानमन्त्री केपी शर्मा ओलीलाई प्रधानमन्त्री पदबाट राजीनामा दिनु राम्रो हुन्छ भनेर अनुरोध गर्ने एकजना म पनि थिएँ । उहाँले राजीनामा दिनुभयो । त्यसपछि प्रतिनिधिसभा भङ्ग गर्ने र सुशीला कार्कीलाई प्रधानमन्त्री मनोनयन गर्ने अवस्था भयो ।
त्यसपछि फागुन २१ गतेको निर्वाचन घोषणा भयो । यी सबै घटनामा सम्माननीय राष्ट्रपतिले पनि अत्यन्त सकारात्मक रूपमा भूमिका निर्वाह गर्नुभयो ।
आज तपाई नेपालको ४३ औँ प्रधानमन्त्री बन्नु भएको छ । आजको अवस्थासम्म शान्तिपूर्ण रूपमा सम्पन्न भएका राज्यका क्रियाकलापहरूमा प्रकारान्तरले केपी ओलीजीको पनि योगदान छ ।
प्रधानमन्त्रीज्यू,
म प्रश्न गर्न चाहन्छु कि, ७४ वर्षको वृद्ध अवस्थामा पुगेका नेकपा (एमाले) का अध्यक्ष केपी शर्मा ओलीजीलाई किन अपमानित हुने गरी हिरासतमा राख्नुहुन्छ ? उहाँलाई थुन्नका निम्ति जे-जे तथ्य जम्मा गरिएको छ, ती सबै अदालतबाट प्रमाणित भएपछि थुनेर कारबाही गर्नु भए हुन्न र ? हाम्रो कानुनी व्यवस्था एवं विगतका अभ्यास अनुसार कुनै पनि घटनाका छानबिन प्रतिवेदन सरकार समक्ष पेस भएपछि सम्बन्धित निकायले अध्ययन र अनुसन्धान गरेपछि, त्यस्तो अनुसन्धानको निष्कर्ष अनुसार मात्र कारबाही प्रक्रिया अगाडि बढ्ने हो ।
प्रधानमन्त्री ज्यू !
हाम्रो संविधानबमोजिम कसैलाई मृत्युदण्ड दिइन्न । तर, संसारका अन्य राष्ट्रमा मृत्युदण्ड दिने व्यक्तिलाई पनि अन्तिम इच्छा सोधिन्छ । केपी शर्मा ओलीका हकमा आकर्षित गरिएका वा गर्न खोजिएका कसुरलाई घटना, प्रमाण र कानुनले के भन्छ भन्ने कुराको परीक्षण पहिला हुनुपर्ने थियो । त्यसो नगरी रातारात घर घेरेर, एकाबिहानै पक्राउ गर्ने शैली गलत थियो । म अनुरोध गर्दछु, ती गल्ती सच्याउनुहोला । एउटा वृद्ध, शारीरिक रूपमा पनि अस्वस्थ राजनीतिक व्यक्तिलाई यो तहको सकसमा पार्नु उचित छैन ।
अन्त्यमा यहाँको सफल र प्रभावकारी कार्यकालका निम्ति फेरि पनि शुभकामना व्यक्त गर्दछु ।
हार्दिक अभिवादन सहित,
वामदेव गौतम
- पूर्वउपप्रधानमन्त्री तथा गृहमन्त्री
- केन्द्रीय सदस्य, नेपाली कम्युनिस्ट पार्टी
