२८ मंसिर, काठमाडौं - ट्रान्सपरेन्सी इन्टरनेशनल (टीआई) नेपालले महान्यायाधिवक्ता सबिता भण्डारी बराललाई संस्थाको साधारण सदस्यबाट अस्थायी रूपमा निलम्बन गर्ने निर्णय गरेको छ। सार्वजनिक पद सम्हालेपछि उनीसँग जोडिएका केही विवादहरूलाई मध्यनजर गर्दै कार्यसमितिले उक्त कदम चालेको हो।
टीआई नेपालका एक कार्यसमिति सदस्यका अनुसार संस्थाको मूल्यमान्यता, विश्वास र नैतिक मापदण्ड जोगाउन यस्तो निर्णय आवश्यक ठानिएको हो। “संस्थाका पदाधिकारी वा सदस्यबारे सार्वजनिक रूपमा प्रश्न उठेपछि त्यसको सम्बोधन गर्नु हाम्रो दायित्व हो,” उनले भने।
उनका अनुसार विवाद सुरु भएलगत्तै बराललाई पदबाट राजीनामा दिएर अवस्था सहज बनाउन सुझाव दिइएको थियो। तर उनले त्यसलाई अस्वीकार गरेपछि कार्यसमितिले अस्थायी निलम्बनको निर्णय गरेको हो। यद्यपि, सम्बन्धित विषयमा स्पष्टता आएमा निलम्बनको निर्णय पुनः विचार गर्न सकिने उनले बताए।
कार्यसमितिका सदस्यका अनुसार बराल सार्वजनिक जिम्मेवारीमा पुगेको र उनले लिनुपर्ने केही निर्णयहरूबारे सार्वजनिक वृत्तमा उठेका प्रश्नहरू नै निलम्बनको प्रमुख आधार बनेका हुन्।
भ्रष्टाचारविरुद्ध विश्वव्यापी रूपमा निगरानी र वकालत गर्दै आएको ट्रान्सपरेन्सी इन्टरनेशनलको नेपाल च्याप्टरका रूपमा टीआई नेपाल सक्रिय छ। वरिष्ठ अधिवक्ता समेत रहेकी सबिता भण्डारी बराल टीआई नेपालको साधारण सदस्य रहँदै आएकी थिइन् र यसअघि पटक–पटक कार्यसमितिमा पनि निर्वाचित भएकी थिइन्।
