६ फागुन,काठमाडौं - ललितपुर–२ मा प्रतिनिधिसभा सदस्यका उम्मेदवार जगदीश खरेल र एक मतदाताबीच चुनावी भेटघाटका क्रममा तीव्र भनाभन भएको छ। राष्ट्रिय स्वतन्त्र पार्टी (रास्वपा) बाट उम्मेदवारी दिएका खरेल मत माग्न पुगेका बेला स्थानीय मतदाताले उनको विगतका अभिव्यक्ति र राजनीतिक धाराबारे प्रश्न उठाएका थिए।
प्रत्यक्ष संवादका क्रममा मतदाताले विगतमा टेलिभिजन अन्तर्वार्तामा व्यक्त विचारहरू स्मरण गराउँदै रास्वपा विदेशबाट प्रभावित पार्टी भएको आरोप लगाए। त्यसपछि खरेलले आफ्नो पार्टी देशको भविष्य निर्माण गर्ने शक्ति भएको दाबी गर्दै आलोचकलाई ‘हनुमान’को संज्ञा दिएका थिए। उनले उक्त मतदातालाई “हनुमान बनेर आरोप लगाइरहनुभएको छ” भन्ने अभिव्यक्ति प्रयोग गरेका थिए।
यसैबीच, खरेल केही समयअघि सुशीला कार्की नेतृत्वमा प्रस्तावित अन्तरिम सरकारमा निर्वाचनसम्बन्धी जिम्मेवारीसँग जोडिँदै सञ्चारमन्त्रीको भूमिकामा गएका थिए भन्ने प्रसंग पनि पुनः चर्चामा आएको छ।
उम्मेदवारी मनोनयन हुनुअघि सम्म आफू कुनै दलमा आबद्ध नरहेको बताउँदै आएका खरेल अन्तिम समयमा रास्वपामा प्रवेश गरेपछि उनको राजनीतिक यात्राबारे विभिन्न प्रश्न उठिरहेका छन्। उक्त घटनाले ललितपुर–२ को चुनावी माहोल थप तातिएको छ।
