काठमाडौँ १७ भदौ - चिनियाँ सहर तियानजिनमा भएको साङ्घाई सहयोग सङ्गठन (एससीओ) शिखर सम्मेलनको क्रममा रुसी राष्ट्रपति भ्लादिमिर पुटिन र भारतीय प्रधानमन्त्री नरेन्द्र मोदीबिच कारमा नै ४५ मिनेट लामो छलफल भएको छ।
दुई नेताबिचको यो भेटलाई अमेरिकी राष्ट्रपति डोनाल्ड ट्रम्प र विश्वमा अमेरिकी प्रभुत्वलाई चुनौतीको रूपमा हेरिएको छ।
भेटपछि मोदीले पुटिनसँगको यात्राको तस्बिर सामाजिक सञ्जालमा पोस्ट गर्दै यसलाई 'अन्तर्दृष्टिपूर्ण' बताएका छन्। पुटिनका प्रवक्ताले दुवै नेता सहज महसुस गरेको र त्यसैले कारभित्रै कुराकानी जारी राखेको बताए।
यो भेट ट्रम्पले भारतलाई रुसी तेल र हतियार खरिद गरेको भन्दै ५० प्रतिशतसम्मको उच्च महसुल लगाएपछि भएको हो। यो महसुलमा युक्रेन युद्धका लागि रुसलाई आर्थिक स्रोत जुटाउने कारोबारमा २५ प्रतिशत जरिवाना पनि समावेश छ।
हिन्द-प्रशान्त क्षेत्रमा अमेरिकाको महत्त्वपूर्ण रणनीतिक साझेदार रहेको भारतले भने रुसबाट खरिद बन्द गर्ने कुनै सङ्केत देखाएको छैन। तियानजिनमा पुटिन र मोदीबीचको यो हार्दिकतालाई ट्रम्पको धम्कीको सन्दर्भमा हेरिएको छ। हालैसम्म अमेरिका भारतको सबैभन्दा ठूलो व्यापारिक साझेदार थियो।
यता, पुटिनले ट्रम्पले दिएको युक्रेनका राष्ट्रपति भ्लोदिमिर जेलेन्स्कीसँग शान्ति वार्ता गर्नुपर्ने समयसीमाको सामना गरिरहेका छन्। रुसले भने यस्तो कुनै भेटको योजना नभएको बताएको छ।
तियानजिन शिखर सम्मेलनमा बोल्दै पुटिनले युक्रेनी सङ्कट समाधानका लागि गरेको सहयोग र प्रयासका लागि चिनियाँ र भारतीय नेताहरूलाई धन्यवाद दिए। आफ्नो सम्बोधनमा पुटिनले गत महिना अलास्कामा ट्रम्पसँग भएको भेटमा 'सहमति भएको' कुराले 'युक्रेनमा शान्तिको बाटो खोल्दैछ' भन्ने आशा व्यक्त गरे।
ट्रम्पले गत अगस्ट २२ मा रुसी राष्ट्रपतिलाई केही हप्ताभित्र जवाफ दिन अल्टिमेटम दिएका थिए। यो अल्टिमेटमको शृङ्खलामा पछिल्लो हो, जसलाई पुटिनले बेवास्ता गर्दै आएका छन्।
ट्रम्पले यसअघि नै युक्रेन युद्ध एक दिनमा नै समाधान गर्न सक्ने बताएका थिए। रुसले सन् २०२२ को फेब्रुअरीमा युक्रेनमाथि पूर्ण-स्तरीय आक्रमण सुरु गरेको थियो।
